Wednesday, August 29, 2012

Cerpen Loghat Nogori - SOFEA

Cerpen ini hamba hasilkan dihujung tahun 90'an dulu. Dah agak lama, kira taraf retro la gamaknya......

 


SOFEA



Suasano godong kek kampung Seri Jemapoh pagi tu cam biaso, highuk pikuk dek sogho bebudak mudo.Ado pun higuk pikuk itu bukanlah disobabkan dek ado mesorat atau ado persidangan tapi disobabkan dio oghang ni tongah celen main dam. Inilah satu-satunyo tompek lepak paling ngam kek Jemapoh.Sambil bughak-bughak buleh jugak order teh atau air botol, lopeh tu buleh pulak masuk buku.Ini yolah kojo bebudak mudo kek kampung ni, banyak membuang maso.Kok kojo pun selalunyo tak totap asik bortukar yo , lopeh tu menonggok balik kek ghumah mak ayah.daghi pagi sampailah ko potang , mombuang maso yo .Kok  maso yang berghogo tu dihabihkan dongan membaco bahan-bahan ilmiah, dapek yo monambah pongotahuan. Kok di tanyo pasal IT ontah ado yang tau ontah tidak, kok tau pun mungkin sotakat lagu IT yo.Tapi tak la sumo budak kek kampung ni macam tu, ado yo yang berguno tak mongabihkan bogheh omak bapak , cumo sayang jumlahnyo agak kocik.
Adat budak mudo la kok dah berjumpo macam-macam la ceghito yang keluar , pasal konset , betino , artis dan macam-macam laei. Kok nak tau apo-apo beghito terkini , datang yolah kek sini tak payah susah-susah poei caghik kek CNN. Antagho topik yang selalu sangat di donga daghi mulut pelepak ( ado ko bahaso camni ) kek godong ni yolah pasal si Sofea anak Pak Subaei. Kok dalam sohaghi tak ado ceghito pasal Sofea , memang tak moghiah lah suasano kek godong.
“Kau tau Lim , den nengok si Sofea tu makin haghi makin cun , hai toghingin den nak masuk mominang,”Norman Helmi momulokan bichagho.
“Muko cam kau nak masuk mominang budak tu ! Ghonti an lah Man , ceghomin tu kok nengok muko kau pun pocah kau tau.Kojo dah lah tak ado , apo kau nak boghi Sofea tu makan kulit dian ! Elok-elok kojo kilang kek Seghomban maghin, kau poei beghonti.”
“Ceh macam la kau tu berkojo.Ado kobun gotah limo onam ekarpun kau buek tak podulik yo, busuk konon !”
“Ala jangan la kau hot Man , sebona eh den ngan kau ni samo yo.”
“Tapi kan den donga dah ado budak meghisik dio tu , dah tu Pak Subaei teghimo pulak.” Farooq tibo-tibo pulak monyampuk.
“Eh yo ko Roq , kau jangan main-main den senkelet dahi tu kang.”
“Buek apo den nak main-main pulak, awek den Nora yang bagi tau.Tapi dio pun donga ceghito oghang jugak.Kok kau nak tau poei la tanyo ngan Pak Subaei tu.”  
     
“Gilo ,  kau nak mampuih, oghang tuo tu ado silat , di teghajang kek oghang tuo tu kang sio-sio yo.”
“Hoi apo ceghito pasal Sofea ni ha tak ado ceghito lain ko.Den lompang seko-seko kang baghu tau ! ” Tompik Lamin yang baghu tibo di godong.
“Hoh dio ni pun satu , tak buleh pulak oghang nak berceghito pasal Sofea.Macam la Sofea tu nak kek dio.Soda lah sikit yang muko kau tu onam boleh kali lobih bughuk daghi kambing atuk den !”Norman dah mulo naik angin.
“Lagi bughuk daghi kambing kau kato muko den , den ghembat kau kek jamban godong ni kang Man !”

“Dah la tu Man tak usah kito layan budak ni.Macam la Sofea tu dio yang punyo sampai ogang nak berceghito pun tak buleh.Dah tu , moh kito poei ko Pilah . Lepak situ lagi best tak do muko mamat ni nak kacau.”Kata Farooq sambil bangun meninggalkan godong diikuti oleh yang lain.
“Hoi kok nak gaduh moh lah , apo nak laghi pulak !!  ”Lamin memang syok kek Sofea , tu sobab dio maghah kalau ado oghang berceghito pasal Sofea. Sebona eh Sofea pun tak  tau yang Lamin syok kek dio dan dio pun tak peghonah ado hati kek Lamin. Oghang kampung mengatokan Lamin ni budak tigo suku dan bodoh-bodoh alang. Walaupun begitu dio ni budak baik dan suko menolong oghang. Kalau ado oghang buek kendughi kendagho , muko Lamin mesti ado menolong. Daghi caghik kayu api sampailah ko membolah kelapo , sumo Lamin buleh buek. Lamin buek sumo kojo tu dongan ikhlas , tak peghonah dio mintak upah. Walaupun begitu ogang kampung ado jugak hulo-hulo pado Lamin sobab dia oghang tau yang Lamin ni hidup susah.
Lamin beghedar menuju ko pangkin bawah pokok beghingin kek topi sawah.Hatinyo masih paneh dongan kolakuan budak-budak tadi. Sambil itu fikirannyo molayang mombayangkan  muko Sofea. Maso kocik-kocik Lamin memang selalu main masak-masak dongan Sofea. Dio tak minat nak main bola macam budak lolaki lain. Lamin ghaso cukop bahagio kalau maso main tu dio kono jadi pongantin dongan Sofea.Yo lah dah dio soghang yo lolaki yang main masak-masak, jadi secagho otomatiknyo dio buleh monjadi pongantin.Maso mongaji pun Lamin poei samo-samo dongan Sofea. Kalau Sofea nak apo-apo , sobot yolah sumo Lamin buleh tolong caghikkan. Lamin ghelo satu ketiko memanjek pokok ghambutan yang berkeghonggo semato-mato sobab Sofea merengek nak makan rambutan.Kok Liza debab yang mintak , sikit pun tak dihapikkan kek Lamin.
Daghi sekolah ghondah sampai la ko sekolah monongah Lamin masuk ko sekolah yang samo dongan Sofea.Bezonyo Sofea duduk kelas nombor satu dan Lamin kek kelas corot.Begitu jugak time peghekso Sofea selalu dapek naik ponteh ambik hadiah sobab dapek nombor satu sodangkan si Lamin cumo jadi tukang kutip sampah kek keliling ponteh lopeh abih majlis penyampaian hadiah.Sofea cukup aktif dalam porsatuan.Buleh kato semuo persatuan dio masuk dan momogang jawatan yang ponting dalam sotiap porsatuan, yang membuekkan dio jadi populer kek sekolah.Lamin pun ado jugak masuk duo tigo persatuan dan dio pun populer jugak tapi cumo time oghang nak mintak yuran porsatuan yo.Lopeh SRP , Sofea dapek masuk sekolah berasrama kek Seghomban dan Lamin pulak kono jago lombu sobab tak pas.
Daghi jauh Lamin nampak sesusuk tubuh wanita datang ke aghahnyo.Nampaknyo macam Sofea....tapi takkan Sofea nak cari Lamin.Nak main masak-masak kut.Tapi apo ko jadah eh nak main masak-masak.Memang sah Sofea datang moncaghi Lamin.
“Assalamualaikum Lamin , maaf yo kok Pia mongganggu.”Aduih lombut boto sogho Sofea ghaso macam nak gugur jantung Lamin.
“Err ...waalaikumussalam...ado apo datang caghik ese ni ?”
“Ni haa potang luso nanti abah Pia mintak Lamin datang ko ghumah , nak mintak tolong buek kojo sikit, buleh tak ?”
“Eh buleh..buleh , apo pulak tak buleh,”Lamin toghusy monjawab tanpa borfikir panjang. Kalau pasal Sofea memang tak payah nak pikir-pikir , apo pun Lamin akan buek.
“O.k. yo , kok cam tu Pia balik dululah . Jangan lupo tu Lamin.”
Pado potang luso , Lamin datang topat pado waktunyo.Yo lah poei ghumah Sofea mano boleh banyak buang maso.
“Ha elok lah kau copek datang ni Lamin, kok copek kojo copek selosai,”sapo Pak Subaei.
“Pak cik nak sughuh ese buek apo ?”

“Ni pak cik nak mintak kau tolong potikkan 70-80 bijik kolapo kek kobun bolakang ghumah tu.”
“Ah tu sonang yo pak cik.”Lamin tak botangguh toghusy dio ko kobun bolakang rumah Pak Subaei untuk memulokan kojo.Sambil itu matonyo molilau moncaghi kelibat Sofea.Dio nak Sofea nengok kohebatannyo momanjek pokok kolapo , lobih terer daghi boghuk mat yeh.Tak sampai pun duo jam , Lamin selosai molakukan kojonyo.Sambil itu Sofea datang membawakan air untuk Lamin yang ponek berkojo.Mato Lamin melihat keayuan Sofea sampailah Sofea masuk semulo ko dalam ghumah.Hai botuah kok den dapek si Pia ni.
“Err pak cik nak buek apo dongan kolapo banyak-banyak ni , nak buek kendughi ko ?
“A’ah cadang eh camtu la, takkan omak kau tak boghi tau !”
“Ontah tak do pulak omak se cakap apo-apo , sapo pulak yang nak borsunat pak cik ?”
“Kendughi borsunat sapo pulak , den ni nak monikahkan si Pia tu minggu dopan.Lawan eh budak daghi Seghomban kawan Pia maso kek unibersiti dulu.Dio ni kojo bosa........”
Lamin tak dapek mondonga baghih-baghih terakhir kato-kato Pak Subaei , matonyo mulo berkaco.Esoknya oghang kampung tak nampak laei batang idung Lamin , kabanyo dio kojo pelabuhan kek Singapo.

1 comment:

  1. kojo pelabuhan...macam samo ngan den yo....hehehe

    ReplyDelete

Related Posts Plugin for WordPress, Blogger...